قصة بين الانس والجن

السلام عليكم والرحمه

هاي القصه ابوي مخبرني اياها البارحه وعيبتني وحبيت اني اكتبلكم اياها وانصحكم بقراءتها لانها طرررر

كان يا مكان في قديم الزمان وسالف العصر والاوان خخخخخ

المهم يالله نبدأ

في مره كان ريال راحل من مدينته وراكب الناقه مالته طالع من مدينته يسترزق من مدينه بعيده من مدينته وهو يمشي في الصحراء تعب الريال وحب انه يستريح وربط الناقه على الشيره والريال ورا ضو لين ما رقد وهو راقد سمع صوت وقام من رقاده خايف ومسك السيف ماله (( طبعا الريال كان من الريايل الاقوياء في مدينته)) فشاف ريال ثاني ياينه .. قاله صاحبنا : انته انس ولا جني ؟؟ رد عليه : نعم انا جني ... قاله : والمطلوب .. قال الجني : اريدك اتوصلني للمدينه اللي انته رايحلها وهناك عندهم ولد الملك بيتزوج وانا لازم اجتله ... قاله الريال : وليش تجتله .. قال الجني : انته ما عليك الا انك توصلني هناك وانا بتحول الحين لشي صغير وحطني في جيبك ويوم نوصل هناك بتحول افعى وبلدغ ولد الملك وهو راقد .. قال الريال : بس انا ما بنفذلك اللي تباه الا بشرط... قاله الجني : اشرط وانا بنفذلك اي شي تريده .. قال الريال: اريدك اتزوجني بنت ملك الجنانوه .. قال الجني : لا مستحيل وهذا شي ما نقدر انته انس وهي جنيه وما يصير .. المهم صاحبنا ما رضى الا بهذا الشرط... قاله الجني : خلاص ان شاء الله بلبي طلبك بس انته نفذ اللي قلتلك عليه .. المهم الجني اتحول ودخل في جيب الريال ووصلو المدينه وبعد حفله الزواج اتحول الجني لافعى وسار يريد يلدغه لكنه رجع للريال وقاله الريال : ها شو صار .. الجني : ما قدرت الدغه شفت حاجز من نور يمتد لين السما هذا الحاجز يمنعني من اني اقترب منه .. قال الريال: وشو سبب هذا الحاجز من النور .. قال الجني : هذا بسبب انه يقرا ايه الكرسي قبل النوم ... لكن ما عليه انا بحاول باجر لازم الدغه يعني لازم .. وفي اليوم الثاني راحله ورجع نفس الشي ما قدر يلدغه لكن قال بعدني بجرب في اليوم الثالث وراح الجني ورجع عند الريال .. واهل المدينه يصارخون وولد الملك مات ... الريال : ها شو صار شو مستوي .. الجني : قدرت اجتله والدغه لانه ما قرا ايه الكرسي في هاي الليله ... المهم اتحول الجني ودخل في جيب الريال وركض به لين الصحراء ..الريال للجني : الحين انا نفذتلك اللي اتريده ولازم تنفذ اللي انا اريده منك .. قال الجني : فاالك طيب بيبلك بنت الملك بس الجنانوه يشرطون عليك بشرط .. الريال : شو هو الشرط .. الجني : انك ما تنازعها ولا تهزبها ولا تراها بترجع لنا بلمحه بصر .. قال الريال : موافق ... المهم استلم بنت الجنانوه وكاااااانت مزيووونه جمال مب طبيعي عليها وخذها معاه ورجع مدينته ...

المهم في يوم من الايام مات اخو الريال وسارو يدفنونه في وقت الدفن كل الحريم والريايل يصيحون الا حرمه الريال ( الجنيه) تضحك وميته من الضحك والناس ينتقدونها والريال متغيض بلاها هاي جي تضحك المهم هو ما قالها شي سكت عنها لانه لو هزبها بترجع عند اهلها ... وفي يوم من الايام قال الريال بنروح رحله في البر انا وحرمتي .. وراح هو وياها ووصلو مكان فيه سدر وقامت الجنيه شرات الخبله تركض وتناقز وتاخذ من شيلته وتقطعها وتربط فيها جذوع السدر وهو يشوفها ويقول هذي بلاها خبله لكن عادي ما تنلام جنيه .. وشوي وهم في البر حسو بعطش قصور الناقه ما تموت من العطش .. وهم يمشون حصلو بير وفرح الريال وقام ياخذ الدلو ويحطه في البير وباقي شوي والدلو بيظهر من البير عسب يشربون الماي الا وتاخذ الجنيه السجين وتقطع الحبل ويطيح الدلو في البير واتغيض الريال منها لاكنه ملك اعصابه وسكت عنها .... ورجعو البيت .. بعد مرور كم اسبوع صااحو رجال في القريه :: حرررررب حررررب العدوووو في الخااارج ... طبعا مثل ما قلتلكم انه الريال من ابطال القريه وركب الخيل مالته ومتجهز وتوه بيظهر من الباب الا وتيي الجنيه وتاخذ سجينه وتقطع ريول الخيل هنيه الريال عصب بالقوو منها ويعطيها كف على ويها : كيف تقطعين ريول الخيل وبلادي في وقت حرب .. المهم الا ويرد صوبها ما حصلها اختفت عنه الجنيه .. وسار صوب الصحراء والبر ويدو عليها وظهر له الجني اللي متلاقي وياه قبل .. قال الريال : والله كذا وكذا والحرمه ظربتها وشردت . قال الجني : نحن شو شرطنا عليك انك ما تظربها ولا تنازعها .. قاله: بس انا اريدها .. قاله خلاص ماشي بترجع .. قال : بس هي الغلطانه .. قال الجني : كيف هي الغلطانه انته الغلطان .................... .................... .......... ............ طبعا الحين انتو كلكم متغيضين من الجنيه وتقولون هي الغلطانه .................... .................... .......... .................... .....

قال الجني : تذكر يوم ضحكت حرمتك يوم وفاة اخوك كان تضحك على حرمه اخوك لانها في الوقت اللي انتو تدفنون فيه اخوك كانت اتفكر في داخلها منو بتزوج من هايلا الريايل عقب ما مات ريلي .. وحرمتك ضحكت على تفكيرها لانها تقرا تفكير الانسان داخله .. ويوم في البر يوم كانت تربط السدر .. اغصان السدر كانو اخوانها كانو في حرب بين جنانوه ثانين وكانو اخوانها فيهم جروح بالغه .. وكانت هي تربطهم بقطعه القماش عشان تضمد الجروح .. وفي الوقت اللي كنتو فيه عطشانين وقطعت الحبل مال الدلو وطاح في البير كان اصلا داخل البير افعى سامه نطشت كل السم اللي فيها في الماي اللي في البير وانته كنت تريد تشرب منه وهي قطعت الحبل عشان تحميك وتحمي الناقه من المووت ... وعشان وقت الحرب ليش قطعت ريول الخيل كانو يترصدولك ورا الباب الاعداء وياين اصلا عشان يجتلونك انته بالذات ما يريدون حد ثاني ... فنقذتك من الاعداء اللي ورا الباب مال بيتكم .................... .................... ......
وبكى الريال على حرمته واتمنى لو انه ما شربها ولا راحت عند اهلها واتمنى انها ترجع وطبعا هو يايب منها 6 عيال وقاله الجني : انته بتاخذ 3 وهي بتاخذ 3



وهذي نهاية القصه اتمنى انها تعجبكم واريد ردود غاويه